經過我同麥仔多年嘅觀察同研討
我哋都得出呢個結論：
男人去到某個年齡會突然「專一」
開始會經常性去同一間餐廳、叫一個餐⋯
第一次發現呢件事係我細個時
每次一家人出街食飯只有兩個選擇：
1）某間火鍋店 2）某間打冷店
兩間都係有我爸在場食飯嘅指定餐廳。
作為一個鶴佬父親，我爸多數都會去打冷
而細個嘅我係非常非常討厭打冷！
因為9成食物就好似我同麥仔嘅緣份咁：「整定嘅」
除咗碗粥之外（細個唔食蠔仔粥），大部分食物都係凍！
於是呢單野令我對打冷有少少童年陰影。
另一個童年回憶係：細個成日自己去我阿公屋企玩
每次去到午餐都一定，係一定係食白粥加咸菜。
對於一個細路嚟講係地獄一樣，所以我到依家都麻麻地食粥。
到後來我係點確定我呢個睇法呢
就係我發現我哥都有呢種沉悶嘅習慣
佢會嗌嘅外賣只有兩三款左右，永遠係呢兩款交替
茶餐廳一定嗌蒸魚，另一間就一定係咖喱牛腩
從無例外。
到後來我同麥仔講呢樣野，發現佢爸都有呢種特質
然後我同啲朋友講，啲男仔都話佢哋都開始變成咁。
雖然我係一個唔可以連續食太相似食物嘅人
（除咗麵包我可以每朝都食之外）
但我細心諗諗我大個咗都有少少呢種傾向
特別係飲珍珠奶茶嘅時候！！！！！！
原因係我中過太多伏，飲過太多難飲嘅珍奶
同埋人愈大健康愈緊要，珍奶變成奢侈品
我實在接受唔到我辛辛苦苦儲起嘅「珍奶quota」
要浪費喺一杯難飲嘅珍奶身上！！！
間中買到杯難飲嘅我都覺得人生好崩潰
為免減少中伏，所以唯有飲嚟飲去都係嗰一兩間。
最後，祝願各位老男人
揀女人都可以揀野食咁專一固執啦。
IG：@hkgirlfriend
FB：港女友
Search